Më 20 mars 2025, Qendra Barabar në Prishtinë organizoi një forum të titulluar “Strategjitë e Pajtimit për Të Ndaluar Femicidin.” Forumi mblodhi mbi 30 pjesëmarrës, përfshirë përfaqësues të Policisë së Kosovës, Institucionin e Avokatit të Popullit, aktivistë të të drejtave të grave dhe përfaqësues të shoqërisë civile nga komunitetet shqiptare, serbe dhe ato të pakicave të tjera në Kosovë.
Qëllimi i forumit ishte të promovonte dialogun, bashkëpunimin dhe avokimin e përbashkët për përgjigje institucionale më efektive dhe zgjidhje në fushën e parandalimit të femicidit, që përfaqëson formën më ekstreme të dhunës bazuar në gjini. Diskutimi ofroi pjesëmarrësve mundësinë për të shkëmbyer përvoja, për të theksuar sfidat kryesore që hasin gratë që përjetojnë dhunë dhe për të përcaktuar rekomandime konkrete për përmirësimin e politikave dhe praktikave institucionale.
Gjatë diskutimit, pjesëmarrësit theksuan se dhuna ndaj grave dhe femicidi nuk janë probleme të izoluara të disa grupeve specifike, por një sfidë e përbashkët që kërkon një qasje multietnike dhe zgjidhje sistematike. Ata nënvizuan mangësitë në zbatimin e ligjeve ekzistuese, mungesën e trajnimeve të mjaftueshme për përfaqësuesit institucionalë dhe mbështetje të pamjaftueshme për viktimat. U arrit në përfundimin se institucionet duhet të tregojnë më shumë qëndrueshmëri dhe vendosmëri në trajtimin e rasteve të dhunës ndaj grave dhe të sigurojnë mbështetje të qëndrueshme për viktimat, përmes mekanizmave më efektivë dhe lokalë.
Rekomandimet kryesore nga forumi përfshijnë: përfshirjen e shoqërisë civile dhe aktivistëve për të drejtat e grave në këshillat e sigurisë komunale, rritjen e buxheteve për zyrat e barazisë gjinore, përmirësimin e bashkëpunimit mes qendrave të punës sociale dhe policisë, trajnime të detyrueshme për oficerët e policisë për të punuar me viktimat e dhunës, si dhe botimin e rregullt të vendimeve të gjykatave për rastet e femicidit dhe dhunës ndaj grave. Për më tepër, forumi rekomandoi zbatimin e modeleve mbrojtjeje, ku viktimat mbeten në shtëpitë e tyre pas raportimit të dhunës, ndërsa autorët largohen nga hapësira e përbashkët, në përputhje me praktikat ndërkombëtare.
Forumi është pjesë e iniciativës më të gjerë Barabar Connect, e implementuar nga Qendra për Veprim Social Pozitiv – CASA, me mbështetje nga Ambasada e Zvicrës në Kosovë. Ky projekt ka për fokus forcimin e bashkëpunimit ndërmjet komuniteteve përmes dialogut, krijimit të rrjeteve dhe nismave të përbashkëta të avokimit që adresojnë çështje të rëndësishme sociale, përfshirë të drejtat e grave, të drejtat e personave me aftësi të kufizuara, iniciativa mjedisore dhe mirëqenia e kafshëve. Qëllimi i projektit është të rritet përfshirja sociale, të përmirësohet bashkëpunimi mes komuniteteve të ndryshme dhe të kontribuohet në kohezionin social në Kosovë.
Të gjitha rekomandimet nga forumi do të mblidhen në një dokument të harmonizuar që do t’i dërgohet institucioneve përkatëse, si një bazë për vazhdimin e avokimit dhe reformës institucionale.
